aSyg 10:1
bIs 13:19+, 21:9; Yer 50:39+
cSyg 14:8, 17:2
dMbnp 19:12+; Yer 51:6; 2Kor 6:17
fMbo 137:8; Yer 50:29
gIs 47:7+
hYer 50:34
iYer 50:46; Ezek 26:16+
jIs 21:9
kEzek 27:28-36
lYer 25:10
mMt 23:35+; Syg 17:6+
Revelation of John 18
Babilon itap izi inim mbeb sorok
1Muri ghoro, matag ila le naghita aŋela eez ipul sambam ve izi inim. Ye tapiri tiina kat, ve ŋguruba isul taan le ighazooŋ kat. a2Ye imboob aliŋa tiina kat ighaze:
“Ndug tiina Babilon isami wa! Itap le isami kat! Aazne, ndug balim kat. Tamtoghon eta ineep muul maau.
Tauto mbeb naol to tiŋgalaaŋ ila Maaron mata maau ne, tighami inim ledi inadi to nepooŋ.
Avuvu samsamiadi, man samsamia, ve mbeb samsamia naol to lolood pa taghita di maau ne, tilup di tonowe. b
3Pasa, ndug tonowen to igheghereb ndug ndug pa ghamuuŋ ŋgar samia ve yesŋa tighurghur maat.
Ye ipaghun di pa vaen toni ariaŋa kat, le ŋgar todi iwaghamgham. Yes kinik to taan paam, yesŋa tighurghur maat.
Ye ighaze igham mbeb popoiadi naol to taan tinim le, ve ineep poia le poia kat.
Tauto ndiran to raukoliiŋ tilala toni, ve tigholia mbeb todi ila toni, ve tinim mbaliiŋ taudi.” c
4Ve nalooŋ saveeŋ ite ineep sambam ve izi inim ighaze:
“Tamtoghon tiou, apul ndug tonanan ve aghau. Pa vene, iyes gham pa ŋgar toni samia, ve pataŋani to pale iza toni, iza tiam paam. d
5Pasa, sosor toni indoui izala izala le ikis sambam paroŋania wa. Ŋgar toni samsamia naol tonowen, Maaron mata kisin di. e
6Ŋgar samsamia naol to ye ighamgham di, yam apamuul di timuul tila pani. Ve atia to aghaze agham pani ne, aghur ite paam izala pogho ve agham pani!
Muuŋ, ye itoor ya ariaŋa pa tamtoghon ve ipaghun di pani. Tovenen aazne, yam irau atoor ya ariaŋa kat, ve aliŋi ila ye tau rubruub toni, le ivon kat. Leso ighuni le isooŋ katini. f
7Muuŋ, ye ipakuri kat, ve igham mbeb popoiadi naol to taan tinim le, ve nepooŋ toni poia kat. Tovenen ye pale iyamaan yabyabuuŋ tiina ve itaŋ, leso iyat ŋgar toni tonowen.
Pasa, ye igham tini ighaze: ‘You garawaat tidi. Nambool pa mbeb eta maau. You pale naneep ila inag to ghamuuŋ pooz, ve nepooŋ tiou poia moghon itaghoni taghoni gha ila. You naar leso nataŋ? Maau. Pataŋani eta irau ivot payou maau.’ g
8Pataŋani naol to Maaron pale ighur di pani, nene pale tisob tivot pani pa ndag ee moghon. Sawa tonenen, taŋiiz, pitool, ve moroghooŋ toman mateeŋ pale tivot pani. Ve yab pale ighani, le inim avab.
Pasa, Tiina toit Maaron to pale ighur atia pani, ye ariaŋa ve tapiri tiina kat.” h
9Yes kinik to taan to muuŋ yesŋa liva tonenen tighur maat ve tigham nepooŋ poia kat ila toni, ighaze tighita yab ighani ve mbuasa iza, nene pale lolodi isami kat ve titaŋ tiina pani. i
10Sawa to tighita yabyabuuŋ tiina ighami, matughezaaŋ tiina pale igham di, ve tineep saguan ve tiŋazuuva tighaze:
“Oyai, ukaria taum wa! Aa ndug tiina, ukaria taum wa!
Babilon, yom izam ve tapirim tiina. Eemoghon aazne, ugham atia tiom, ve rikia moghon pataŋani tiina igham ghom ve umbiriis.” j
11Ve ndiran to raukoliiŋ irau taan isob, pale lolodi ipataŋan ve tikausim pani. Pasa, ledi tamtoghon eta to ighol mbeb todi muul maau. k
12Muuŋ, tigholia mbeb naol naol ila toni: Gol, silva, ŋgool atulu, ve yaam milmilia pida to popoiadi ve atiadi tintina. Ve uli popoiadi to bodeeŋadi pisosooŋa, aindan, ve kaviaaŋa, ve ai pida to vuzidi popoia toman mbeb popoia naol to tigharaat di pa elepan ndooŋa, ve ai popoia to atiadi tintina, ain, baras, ve yaam pida to bodeeŋadi popoia. 13Ve mbeb pida paam to vuzidi popoia ve atiadi tintina. Ve vaen, ŋgoreeŋ, aniiŋ, makau, sipsip, ve hos toman karis. Ve tigholia tamtoghon paam tinim mbesooŋa sorok. Mbeb naol tonene, irau tiraukol padi tonowe muul maau.
14Ve yes pale tisaav pa ndug tiina Babilon tighaze: “Mbeb naol to lolom igham padi, eta igharau ghom muul maau. Mbaliiŋ tiom to popoiadi kat ve ughamgham izam padi, tisob tilaledi wa. Irau ughita di muul maau.”
15Ndiran to raukoliiŋ to tigholia mbeb todi izi Babilon ve tinim mbaliiŋ taudi, pale timatughez pa yabyabuuŋ tiina to ighami. Tovenen yes pale tineep saguan pani, ve tikausim pani tighaze:
16“Oyai, ukaria taum wa! Ndug tiina, ukaria taum ve usami wa.
Muuŋ, yom undud ghom pa nonogiiŋa popoiadi kat to bodeeŋadi pisosooŋa, aindan, ve kaviaaŋa. Ve utiik taum pa mbeb naol to tigharaat di pa gol, ŋgool atulu, ve yaam popoia pida to atiadi tintina.
17Eemoghon sawa tuku tonene, mbaliiŋ tiom tisob tisami ve tilaledi.”
Ve yes daba to waaŋ toman uraata todi, ve yes to tiza waaŋ toman di, ve tamtoghon tisob to tiravraav pa raukoliiŋ ne paam, pale tisob tiyoon saguan. 18Ve matadi ila pa mbuas to izaza pa ndug tiina Babilon, ve tikausim pani tighaze: “Oyai, sa ndug tiina ite paam to irau Babilon?” 19Tovenen lolodi ipataŋan, titaŋ tiina ve timoŋ pani. Ve tiŋazuuva tighaze:
“Oyai, ukaria taum wa! Aa ndug tiina, ukaria taum ve usami kat!
Aazne, rikia moghon ve umbiriis ve ulalem. Pale nigham vena?
Mbaliiŋ tiom moghon, tauto yei to lemai waaŋ ne, nisob ninim mbaliiŋ tau.”
20“Tovenen yam to ndug sambam, yam mbaŋooŋa to Krisi, yam propeta, ve yam tamtoghon patabuaŋa to Maaron, lolomim poia ve tinimim iza! Pasa aazne, Maaron iŋgabiiz ndug tiina Babilon, ve ighur atia pani pa iyat sosor to ye igham payam.”
21Ghoro naghita aŋela eez to tapiri tiina kat, igham yaam tiina eez ve ipiyaava izila pa te, ve isaav ighaze:
“Ŋgar raraate tovene pale ivot pa ndug tiina Babilon. Pale tireua ilale. Irau tighita muul maau.
22Tovenen tamtoghon eta pale ineep izi ndug Babilon, ve ilooŋ mbouŋ, gita, tavuur, sab, ma mbeb ite paam avolutu tonowe muul maau. l
Ve ndiran to tighagharaat mbeb naol naol ne paam, eta pale ineep tonowe muul maau.
Ve yaam tintina to mumuuŋ wit inim palawa ne paam, irau talooŋ avolutu ila ndug lolo muul maau.
23Ve lam eta irau ighan ila ndug lolo muul maau.
Ve oroor to vaivaiŋa papaghu irau ivot ila ndug lolo muul maau.
Ndiran tiom to raukoliiŋ tiraua kat. Tilib pa tamtoghon tisob to taan.
Ve mur tiom, nene ighamun ndug tisob ŋgar todi le tiyel pa ataam to Maaron.
24Yom urabrab tamtoghon patabuaŋa to Maaron ve yes propeta toni toman ival tiina to taan, ve siŋ todi imaliŋ. Tovenen lem sosor tiina kat ila Maaron mata.” m
Copyright information for
TUCO